राज्यलाई ठग्नेहरूलाई कारबाही गर्न खाेज्दा राजनीतिक दबाब आयाे : गृहमन्त्री श्रेष्ठ

104

कास्की – उपप्रधान एवम् गृहमन्त्री नारायणकाजी श्रेष्ठले राज्यलाई ठग्नेहरूलाई कारबाही गर्न खोज्दा राजनीतिक दबाब आउने गरेको बताउनुभएको छ ।

गण्डकी प्रदेशस्तरीय सुरक्षा गोष्ठीको पोखरामा उद्घाटन गर्दै गृहमन्त्री श्रेष्ठले अपराध गर्नेहरूलाई कारबाही गर्न खोज्दा निरन्तर हस्तक्षेप भइरहेको बताउनुभयो । कुनै अपराध, ठगी, जालसाजीमा राजनीतिमा जोडिएको मान्छे पर्‍याे भने राजनीतिक पार्टीका नेताहरू कराउन थाल्ने गरेको उहाँको भनाइ छ ।

गल्ती, अपराध गर्नेहरूलाई कारबाही गर्न थाल्ने बित्तिकै उद्योगी व्यवसायीहरूले वक्तव्यबाजी शुरु गर्ने गरेको उल्लेख गर्दै मन्त्री श्रेष्ठले कसैलाई पनि राज्यलाई लुट्ने छुट दिन नसकिने बताउनुभयो ।

बाँसबारी छाला जुत्ता कारखानाको १० रोपनी सरकारी जग्गा हडपेको आरोपमा व्यापारी अरुण चौधरी, कारखानाका तत्कालीन कार्यकारी प्रमुख अजितनारायण सिंह थापा र आम्रपाली कन्ट्रक्शनका सञ्जय ठाकुरलाई नेपाल प्रहरीको केन्द्रीय अनुसन्धान ब्युरो (सीआईबी) ले हिजो पक्राउ गरेको थियो । उनीहरू पक्राउ परेलगत्तै नेपाल उद्योग परिसङ्घले पत्रकार सम्मेलन गरेर व्यापारी चौधरीलाई प्रहरीले अकस्मात् पक्राउ गरेर निजी क्षेत्रको मानमर्दन गरेको बताएको थियो ।

अहिले व्यवसायी चौधरी र बाँसबारी छाला जुत्ता कारखानाका तत्कालीन प्रमुख अजितनारायण सिंह थापा अस्वस्थ रहेको भन्दै ग्रान्डी अस्पताल पुर्‍याइएकाे छ । काठमाण्डौ जिल्ला अदालतले पक्राउ परेको तीन जनामाथि अनुसन्धान गर्न चार दिनको म्याद दिएको छ ।

LEAVE A REPLY

Please enter your comment!
Please enter your name here