१९ मंसिर,पर्वत-पर्वतको महाशिला गाउँपालिकामा पाँचौं राष्ट्रपति रनिङ शिल्ड प्रतियोगिता सुरु भएको छ। महाशिला–३ बालकोटस्थित कृष्णगोपाल स्मृति खेल मैदानमा विहीबारबाट प्रतियोगिता औपचारिक रूपमा उद्घाटन गरिएको हो। प्रतियोगितामा गाउँपालिका भित्रका १२ विद्यालयले सहभागिता जनाएका छन्।
उद्घाटन कार्यक्रमका प्रमुख अतिथि तथा जिल्ला समन्वय समिति पर्वतका प्रमुख विष्णुराम विकले खेलकुदले नयाँ प्रतिभा पहिचान गर्न तथा खेल क्षेत्रको विकासमा ठूलो योगदान पुर्याउने बताए। उनले खेलले शारीरिक तथा मानसिक दुवै पक्षलाई सबल बनाउने भएकाले विद्यार्थीलाई सानै उमेरदेखि खेलकुदमा सक्रिय बन्न आग्रह गरे।
त्यसैगरी, महाशिला गाउँपालिका अध्यक्ष ईश्वरप्रसाद भुसालले खेलकुद विकासका लागि गाउँपालिका निरन्तर प्रतिबद्ध रहँदै आएको बताए। उनले प्रत्येक वर्ष गाउँपालिकाबाट प्रतिभावान खेलाडी उत्पादन भइरहेकोक उल्लेख गर्दै ती प्रतिभालाई प्रोत्साहित गर्न विभिन्न कार्यक्रम सञ्चालन भइरहेका जानकारी दिए। खेलकुदले विद्यार्थीको भविष्य निर्माणमा महत्वपूर्ण भूमिका खेलेको उनले बताए।
कार्यक्रममा गाउँपालिका उपाध्यक्ष धनसुवा विश्वकर्मा, वडा नं. ४ का अध्यक्ष तथा खेलकुद विकास संयोजक पूर्ण मल्ल, महेन्द्र ज्योति माध्यमिक विद्यालयका प्रधानाध्यापक बालकृष्ण उपाध्यक्षलगायतले शुभकामना मन्तव्य राखेका थिए।
गाउँपालिका अध्यक्ष भुसालको अध्यक्षतामा सम्पन्न उद्घाटन कार्यक्रममा स्वागत गाउँपालिकाका प्रमुख प्रशासकीय अधिकृत देवन्द्र पाण्डेले र सञ्चालन बेलबहादुर परियारले गरेका थिए
उद्घाटनकै दिन सम्पन्न १५ सय मिटर दौडतर्फ छात्रामा सूर्य माविकी आकृति पुलामी प्रथम भएकी छिन् भने छात्रातर्फ महेन्द्र ज्योति लुंखुका अनिल सुनार विजयी कभएका छन् ।
