पर्वत- नेकपा (एकीकृत समाजवादी) पर्वतको दशौं पुर्ण जिल्ला कमिटी बैठक सनिवार कुश्मामा सम्पन्न भएको छ । बैठकमा पार्टीलाई सशक्त र चलायमान गराउन विभिन्न महत्त्वपूर्ण निर्णयहरु भएको पार्टी जिल्ला सचिव बिराज हमालले जानकारी दिनुभयो । पार्टी संगठन सुदृढीकरण तथा सदस्यता बिस्तार अभियानका लागि पालिका स्तरमा मुल अभियन्ता र सह-अभियन्ता तोकिएको उहाँले बताउनुभयो । त्यस्तै पालिका तथा वडामा बैठक बस्ने, नयाँ सदस्यता बिस्तार गर्ने तथा प्रशिक्षण कार्यक्रम संचालन गरिने निर्णय भएको हमालले बताउनुभयो ।
बैठकमा बोल्दै प्रमुख अतिथि नेकपा एकीकृत समाजवादी गण्डकी प्रदेशका इन्चार्ज तुल बहादुर गुरुङले नेपालको राजनीतिमा नेकपा एकीकृत समाजवादी समय परिस्थिति अनुसार देश विकासमा लाग्ने सशक्त पार्टी भएको बताउनुभयो । नीति, बिधि र सिद्धान्तमा अडिग भएर जनमुखी कार्य गर्न पार्टी क्रियाशिल भएको बताउदै सबै नेता कार्यकर्ता आफ्नो ठाउँको विकासमा जोड दिने कार्य गर्न आग्रह गर्नुभयो । त्यस्तै नेकपा एकीकृत समाजवादी गण्डकी प्रदेशका अध्यक्ष श्रीनाथ बरालले आगामी जेठमा हुने पार्टीको राष्ट्रिय महाधिवेशन केन्द्रित कार्यहरू संचालन गर्न जिल्ला कमिटीलाई अनुरोध गर्नुभएको छ । पार्टीको संगठन विस्तार तथा सुदृढीकरण अभियानलाई प्रभावकारी बनाउदै पार्टी सदस्यता विस्तार, वितरण, ननिकरण, पालिका कमिटी, वडा कमिटी, टोल कमिटी, पेशागत कमिटी र जनवर्गीय कमिटी अध्यावधि, गठन तथा पुनर्गठन गर्ने कार्यमा जोड दिनुपर्ने बरालले बताउनुभयो । नेकपा एकीकृत समाजवादी केन्द्रीय कमिटी सदस्य तथा पर्वत जिल्ला इन्चार्ज मोती प्रसाद पौडेलले विभिन्न चुनौतीका बाबजुद पनि पार्टी संगठन बिस्तार गर्दै जनमुखि कार्यमा जोड दिएको बताउनुभयो ।
नेकपा एकीकृत समाजवादी केन्द्रीय कमिटी सदस्य तथा पर्वत जिल्ला सह-इन्चार्ज बैकुण्ठ भुसालले सच्चा र निस्वार्थ राजनीतिकर्ताले अविचलित संघर्ष गर्नुपर्ने बताउदै पार्टीले देश र जनताको हितमा काम गर्नुपर्ने बताउनुभयो । सच्चा र इमानदार नेता कार्यकर्ता क्रमशः एकीकृत समाजवादीमा समाहित हुने उहाँको भनाइ छ ।जिल्ला कमिटी अध्यक्ष ठाकुर शर्मा पौडेलले पालिका तथा वडा स्तरमा गठित कमिटीको अद्यावधिक र कमिटी गठन नभएका ठाउँमा कमिटी निर्माणमा जोड दिएको बताउनुभयो । पार्टीलाई सशक्त र चलायमान गराउन सक्रिय रहदै आ-आफ्नो भुमिका निर्वाह गर्न सबैलाई आग्रह गर्नुभयो ।
यसैबीच बैठकले जिल्ला कमिटी सदस्यमा गुरुदत्त भुसाल, मुमिना खातुन र मुफ्तार अलीलाई मनोनीत गरिएको छ । त्यस्तै मोहम्मद रहिमदिन र मोहम्मद सलाम एकीकृत समाजवादीमा प्रवेश गर्नुभएको छ । जिल्ला कमिटी अध्यक्ष ठाकुर प्रसाद पौडेलको अध्यक्षतामा सम्पन्न बैठकको संचालन जिल्ला सचिव बिराज हमालले गर्नुभएको थियो ।