पर्वत- पर्वतका एक प्राध्यापकले दुई दर्जन भन्दा बढी विभिन्न तहका पाठ्यपुस्तक लेख्न सफल हुनुभएको छ । सहर तथा केन्द्रमा मात्र रहेर बौद्धिक कार्य गर्न सकिन्छ भन्ने मान्यता तोड्दै पर्वतका लेखक लाल प्रसाद शर्माले उत्कृष्ट पाठ्यपुस्तक लेख्न सफल हुनुभएको हो । देशका ठुला सहर तथा काठमाडौंका राम्रा क्याम्पसमा अध्यापन गराउने प्राध्यापकबाट लेखिएका पाठ्यपुस्तक पठनपाठन भएको वर्तमान परिवेशमा उहाँले जिल्लामै रहेर लेखेका दर्जनौं पुस्तक अहिले देशभरका विद्यार्थीहरुको हातहातमा पुगेका छन् ।
पर्वतको साविक कुर्घा गाविस, हाल फलेवास नगरपालिका वडा नं. १० कुर्घामा वि .सं. २०४१ साल जेठ १४ गते जन्मनुभएका शर्मा पुस्तक लेखनमा अब्बल र अग्रस्थानमा रहनुभएको छ । प्राध्यापक शर्मा साबिक धौलागिरी अञ्चलकै सबैभन्दा पुरानो सामुदायिक क्याम्पस, फलेवास नगरपालिका वडा नं. ६,देविस्थानमा अवस्थित पर्वत बहुमुखी क्याम्पसमा विगत १३ बर्षदेखी अध्यापनरत हुनुहुन्छ । ज्ञान नै शक्ति हो भन्ने मान्यतालाई अवलम्बन गर्ने शर्माले ज्ञानको बिक्री गरि जिवनयापन गर्नुको साथै पर्वत जिल्लासंगै देशकै बौद्धिक क्षेत्रलाई फराकिलो बनाउनुभएको छ ।
